EE.01 英來聽歌-〈食菜的刀〉

本集感謝：柏仔修文字、柏仔協助分析、梓提供南管的相關講法 逐家好，歡迎來聽英學宇宙干焦英韶的部分。 因為最近發生的風波，我決定心頭掠予定，透過書寫和錄音來介紹我上愛的專輯，希望逐个攏來欣賞其他優秀的作品。 其實我猶是感覺，曹雅雯的《禁》才是我心木中「最佳台語專輯獎」，伊的專輯紹介寫講：「人也許都犯賤，越是禁忌，總越發迷人。欲加之罪、何患無辭的苦楚，從過去到現在，於你我日常隨處發生。 內心深處的禁地，是恐懼與逃避所餵養，何不乾脆親身踏入，揭發真相，當真正走出荒誕禁忌，所有的事物似乎再也不需緊握，釋懷與放下變成贅詞，讓其被禁錮的靈魂自由生長，開出的花，將異常燦爛。」 簡單說，這張《禁》有幾个意義： 1. 予禁聲的年代(被禁錮的靈魂) 2. 予查禁的歌曲 3. 會予人家感覺禁忌的題材(一寡離經的命案) 先來介紹〈食菜的刀〉，這條歌是柯智豪作詞，柯智豪、拍謝少年、曹雅雯共同作曲，曹雅雯和拍謝少年合唱的臺語歌，是這張專輯押尾的歌，也是我最佮意的一首，因按呢先來介紹。 頭起先，先來講這條歌的靈感，是來自2013年嘉義的豉頭的命案，有人佇嘉義水上一間廟的便所發現一粒用鹽豉的女性頭殼，落尾調查了後，發現是死者的阿兄-陳佳富，親手刣死小妹-陳婉婷。 2012年底陳佳富佇三重刣死小妹，利用廚師專業分解屍體，干焦留一粒頭，就坐火車走去嘉義抨掉頭殼。隔轉年3月，有人寫無徛名的批提醒警方，加上民眾佇公廁發現頭，警方才掠著兇手。 歌曲一開始就有火車的聲音，上尾有火車擋起來、到站的聲音，好親像阿兄刣死小妹了後，紮小妹的頭坐火車的情景，也是死去的陳婉婷和陳佳富最後的對話。毋過詳細分析歌曲，會使發現真趣味的代誌：規條歌有設計合唱，但其實無對唱，也就是無對話，這塊歌是兩人是分別、家己講家己的。 先來欣賞歌詞： （曹雅雯） 綴阿兄 一步一步行 心內偷偷叫你的名 你敢毋知影 看你的背影 一步一步行 人講我媠人無媠命 歹命天註定 （拍謝少年） 別人的倒酒 愈啉愈悲哀 我一直咧等待 毋好講出來 為你我甘願 （合唱） 你是一支食菜的刀 斬斷一般的約束 咱自出生就互相照顧 你是一支食菜的刀 向望將我保護 可惜咱的愛伊食臊(葷) （曹雅雯） 跟阿兄 一步一步走 可有看到我的心肝凝血攏袂散 看你的背影 一步一步行 你煞決定咱就到遮 雄心放下我 （拍謝少年） 捙倒的酒 收袂返轉來 想著阮的愛 就會流目屎 為你我甘願 （合唱） 你是一支食菜的刀 是欲按怎交杯 咱本來就是一家伙 你是一支食菜的刀 聽講人肉鹹鹹 我的心煞酸甜苦澀 （曹雅雯，此段為南管唱詞） 風打梨 霜降柿 燒出爐餅 亦通甲豬鼻 （合唱） 你是一支食菜的刀 是欲按怎交杯 咱本來就是一家伙 你是一支食菜的刀 聽說人肉鹹鹹 我的心煞酸甜苦澀 （輪著唱） 死心兼斷念 死心兼斷念 ＊＊＊＊＊＊ 陳婉婷因為翁婿鬥伙計，離婚了後精神開始出問題，陳佳富愛照顧小妹，真袂爽起痟的小妹時常和厝邊行房來趁錢，害伊真見笑。毋過有厝邊講，陳婉婷時常咧投，講若毋和阿兄行房，阿兄就無愛予伊錢。 另外一方面，陳佳富替陳婉婷保真濟保險，這可能是欠所費的陳佳富，想欲透過刣死小妹領保險金。 命案予歌曲有創作的靈感，雖罔袂使用完全寫是、記錄命案的角度看待，毋過其中的感情安排甲真鬥搭。 小妹和阿兄，兄妹情深，大漢了後，小妹又閣因為精神出問題，需要阿兄照顧，因按呢小妹一直綴阿兄行。 阿兄啉別人倒的酒，代表已經做好決定，但又閣親像共責任捒予別人，直直強調：「為你我甘願」，這句話親像咧安搭、咧騙小妹、我攏是為著你好。也親咧欺騙社會，我是為著小妹好，才按呢做！ 或者是伊咧騙家己，認為家己做的決定－刣死小妹，攏是為著小妹，而且媠人無媠命，既然小妹這世人子已經歹命天註定，我阿兄甘願去背負殺人罪名，結束你歹命的一生！ 刀子剁落來，小妹的人生也烏有去。因按呢「你是一支食菜的刀」，是一種藉口、想欲脫罪，小妹叫是阿兄是食菜的刀，阿兄也按呢共逐个講。 柏仔講：「刀無欲剁肉，食菜無殺生。」 刀仔欲切啥毋是刀仔決定的，切肉切菜攏愛看彼支攑刀的手。 哥哥這支食菜的刀，本來是欲保護小妹的，但「可惜咱的愛伊食臊（葷）」，食菜的刀癮食肉、興剁肉，因按呢才來刣死小妹，若無阿兄對小妹的愛就無法度成立。 酒捙倒矣，代表潦落去、做落去矣，已經無法度收煞。 抑若「是欲按怎交杯，咱本來就是一家伙」這句，對著厝邊講的話：小妹和阿兄可能有行房，阿兄煞欺騙小妹講，咱無法度結婚交杯，因為阮本來是親人、是一家伙仔，所以只會當透過行房來結合，阿兄無法度對你加承諾、立誓。 夭壽，這就是採花蜂、粕男漚膦鳥。 後壁唱「人肉鹹鹹，我的心煞酸甜苦澀。」小妹予人剁做肉，頭殼予豉起來，小妹聽阿兄講的話，肉體感受著剁落來的刀，心情真複雜。 閤愈心適的是這句俗語：「搣鹽豉心肝」 意思是堅定家己的心意、不會變心， 但是另外一个意思是，愛對方死心。 「搣鹽」就是搣一搓鹽，「豉」就是用鹽豉，而因為「豉」的發音聽起來像「死」，所以完整來講就是：「搣鹽豉心肝，死心兼斷念」。這和豉頭的命案就牽起來，也描寫小妹的心情。 無錯，死心兼斷念，這條歌的上尾一句、一直唱。 愛放下、愛死心、愛斷念。 毋知影是咧講這段曖昧的感情，或者是小妹失去性命了後，才知影阿兄的愛是白賊話，所以死心兼斷念。阿兄的心情是，人都刣死矣、也滅屍啊，也只通死心兼斷念。 小妹的頭被用鹽豉起來，命案用來配這句俗語，真正鬥搭。 頭前咱講著：這是合唱，毋是對唱。 阿兄自頭到尾也攏唱「阮的愛」，不是「咱」，這是屬於台語的文法邏輯，這是阿兄家己定義的愛，所謂的愛，愛食葷，愛刣死小妹，予小妹對歹命的人生解脫、予阿兄的生活變閣較好，才是阿兄認為的愛，阿兄愛的是阿兄家己。 這條歌中間閣出現一段南管的詞。其實我對南管真生份，毋過查資料發現這段歌詞的意思是，咧講閩南地區的人，中秋的一寡風俗和場景。根據學習南管的朋友講法，這條南管算是入門、上開始學的一條，這段是咧講好食的物件。咱知影，這條歌和食的物件有關的一段故事就是：小妹的頭予豉起來，身體絞做碎糊糊的肉予處理掉。 這條南管原底的詞最後一段又閣講著：見景傷情，彼是割掉阮腸肝，凡勢，又閣接轉來命案、兄妹的感情、人倫的悲劇。 感謝逐个聽完我落落長的分析，如果有對南管閣較了解的人，歡迎提供分析！總講一句，這條歌真正讚，緊來去聽！ Leave a comment and share your thoughts: https://open.firstory.me/user/ckkhtv9j6oxhx0854h6ke349b/comments 若聽無明聽無清，請點腳本網址： https://powerlessstudio.mystrikingly.com/ 若有問題想欲反映，請點問題表單：https://docs.google.com/forms/d/e/1FAIpQLScVZ8Xr5oyYz9Pd1d9JBQn--BSXfrGt6rppjmJ45m-3JfdBGw/viewform 無寄批也會使： [email protected] Powered by Firstory Hosting

There are no comments yet.

Please log in to write the first comment.