EE.02宇來聽歌

這禮拜錄有夠濟！ 本集感謝柏仔的喙瀾和喘氣聲、韶的的棄嫌。 韶的佮意〈食菜的刀〉，彼誠變態誠合伊。煞落來我想欲講較奇妙的〈回魂〉，若欲講〈回魂〉，就愛先講「朱秀華／林罔腰事件」。「朱秀華／林罔腰事件」咧講1958年的時，有一个雲林麥寮的婦人人林罔腰有一工雄雄講家己是對金門來的朱秀華。自彼工開始，毋捌字、講海口腔台灣話的典型台灣女性林罔腰，就通講華語兼捌字，變做朱秀華去。 朱秀華講伊原底八二三炮戰的時對金門和爸母坐船欲走，路尾拄著船難和賊仔，失去了性命。過路毋知是地藏王菩薩、上帝公抑是佗一尊王爺神尊，就講伊陽壽末了，就借今過往的林罔腰轉返人間。自以後是林罔腰，嘛是朱秀華。 聽著遮爾譀古的代誌，人當然就走去金門確定，看講有影抑無影。煞毋知有影有朱秀華這个人，彼口灶嘛有影無去，只是講詳細到底如何，嘛無人話有。毋知有影借屍回魂，抑講精神有毛病，總講一句，林罔腰和朱秀華就合仝一人去矣，直直到2018年戶口寫林罔腰的朱秀華過往，這層代誌才實在收煞。 〈回魂〉這條歌掠「朱秀華／林罔腰事件」當做靈感，武雄作詞；張三、曹雅雯作曲；曹雅雯演唱。仝款因著時間佮版權的問題，就直接貼佇下跤無欲讀，請各位善人朋友家己去聽。 冷冷的海風，聲聲來喝醒，庄口的風獅爺 紅紅的火光，雄雄飛過了，黃昏的太武山 是啥物罪孽，是啥物冤仇，有啥人會知影 無停的戰火，無情的改變，彼濟人的運命 轉來哦～緊轉來哦～ 失散的囝仔，聽袂著父母，思念的叫聲 轉來哦～緊轉來哦～ 無停的戰火，無情的改變，彼濟人的運命 陣陣的海湧，慢慢將船隻，接引來到台西 脆脆的人命，濁濁个世情，斷送了一蕊花 是誰的保庇，是誰來顯靈，收留著伊一个 無情的時代，無奈的一切，無人知的輪迴 轉來哦～緊轉來哦～ 靈聖的千歲，鎮守在安西，引風牽魂飛 轉來哦～緊轉來哦～ 無情的時代，無奈的一切，無人知的輪迴 靜靜的等待，苦苦的安排，神明也有允准 花花的世間，茫茫的乾坤，陰陽閣再轉輪 是啥物造化，是啥物緣份，心願會當回魂 無為著怨嘆，無為著抾恨，只是為著報恩 轉來哦～緊轉來哦～ 無仝的身軀，仝款的身份，註好的命運 轉來哦～緊轉來哦～ 無為著怨嘆，無為著抾恨，只是為著報恩 ＊＊＊＊＊＊＊＊＊＊＊＊＊＊ 歌曲開始若司公鈃的鈴仔聲和鳥仔聲暗示著和靈魂、死亡、宗教有關係，彼前奏淒涼的感覺予人想著廖士賢《西部》彼塊唱片。是啊，這久雲林台西麥寮彼搭毋就是按呢？這前奏就共歌曲的調性掠甲在在在。啥物款的調性？請聽我繼續話就知。 照音樂和歌詞A、B；A’、B’；A’’、B’’的形式，這條歌會使分做三葩，頭葩交代朱秀華因著八二三砲戰離開金門的背景。紛亂時代的戰火飛過太武山，驚著徛佇庄口的風獅爺。連保庇平安的風獅爺都無平靜，人就愈免講。人到底為啥物欲相戰？為著啥物罪孽冤仇？為著啥物來拚生死？爸母無去囡仔；囡仔叫無爸母，兩爿攏咧喝「轉來喔」，煞賰無停的戰火共𪜶應。毋知為啥物愛拚生死的戰爭改變彼濟人的運命。有命做伙一口灶，無緣鬥陣行到老。 戰火迫人離開，也迫人失去了性命。戰爭時的人若成厚病的花，烏白就予挽去、蔫去。人講查某人油麻菜子命，凊彩落塗凊彩發，毋過戰爭若火四界著四界湠，無一塊好塗是欲佗位發？人命脆脆，世情濁濁，啥人顯靈攏會使，佇這無情時代，就算輪迴嘛無人知會變做啥款，啥人知影會對金門到台西，賰靈魂寄佇無仝的肉體。 佇這个花花世界茫茫乾坤，咱人欲繼續活，神明嘛愛允。世間受苦萬萬人，為啥物干焦允我回魂無允別人？關鍵因著干焦我無怨嘆無抾恨，是為著別人才予允回魂。毋過世間人攏咧抾恨怨慼，若無戰火哪會無煞？上無奈何的，我回魂了後，原仔查某人。毋過毋但查某人，只要世間人人相爭，毋管佇佗位，生做啥物形，就算無仝身軀，身份嘛相成，攏嘛等相刣，命運早就註予死死死。 毋知為啥物的戰爭、毋知咧冤啥物的人、毋知爭啥物的世間。神明敢有靈聖？有啦，只是神明偌𠢕？無遐𠢕啦，尤其眾人攏無彼粒會當予伊顯靈的心，神明有啥路用？攑頭三尺有神明，咱人敢有咧攑頭？ 這條歌的歌詞寫了誠媠氣，有抾恨這款台語詞，到第三葩閣抾濟親像轉輪、乾坤、造化這款佛教抑是古早漢文用的詞，提醒講台語也會使有讀冊氣口這層代誌。總講一句，〈回魂〉用民間傳奇故事當作靈感，來寫反對戰爭和勸人為善的關心，寫了誠有意思。若善人朋友聽了有別項想法，後一條想欲聽啥物，請才和阮講！ 留言告訴我你對這一集的想法： https://open.firstory.me/user/ckkhtv9j6oxhx0854h6ke349b/comments 若聽無明聽無清，請點腳本網址： https://powerlessstudio.mystrikingly.com/ 若有問題想欲反映，請點問題表單：https://docs.google.com/forms/d/e/1FAIpQLScVZ8Xr5oyYz9Pd1d9JBQn--BSXfrGt6rppjmJ45m-3JfdBGw/viewform 無寄批也會使： [email protected] Powered by Firstory Hosting

There are no comments yet.

Please log in to write the first comment.